طلب صادق حصولِ ایمان کی اساس /قاضی عبدالروف ندوی
سرینگر /23مئی /شہر خاص کے مشہورو معروف علمی ادارہ سراج العلوم شاخ ندوۃ العلماء لکھنو ٔ میں دورہ حدیث یعنی کتب اعمال صالح کا افتتاحی درس حضرت قاضی عبدالروف ندوی نے دیا، آپ نے طلبہ سے درس میں فرمایاکہ سب سے پہلے اس تاریخی موقع پر اللہ تعالیٰ کا شکر ادا کرنے کے ساتھ ساتھ آپ سب طلبہ و انتظامیہ قابل مبارک بادہے کہ اللہ تعالیٰ نے آپ کویہ سعادت عطا کی۔اس نعمت پر اللہ تعالیٰ کا شکر ادا کر یں۔
امام بخاری کی کتاب الایمان سے درس کا آغاز کیا گیا۔آپ نے فرمایاطلب صادق حصول ایمان کی اساس ہے ، اعمال صالح سے ایمان میں نور ا نیت حاصل ہوتی ہے ، مجاہدہ وہجرت سے ایمان متعدی ہو تا ہے ۔ جب کہ ذکر اللہ سے اور حقوق العباد کی ادائیگی سے ایمان باقی رہتا ہے اور ایمان پہ خاتمہ نصیب ہوتاہے، چونکہ ایمان سب سے اہم اور اساسِ دین ہے۔اس لئے اس سے درس کاآغاز کیا گیا، تمام کتب حدیث میں بھی بخاری شریف بنیادی و اساسی کتاب ہے۔ اللہ تعالیٰ ہم سب کو حقیقی ایمان نصیب فرمائیں ان امہات الکتب سے منتخب ابواب کو ہی دروس میں شامل کیا گیا ہے تاکہ ہم اس کا احساس شروع سال سے ہی رکھیں کہ اللہ تعالیٰ نے ہمارا انتخاب کیا ہے،ہم اپنے آپ کو اور پوری انسانیت کو ظلم و زیادتی سے نکال کر عدل و انصاف کی عملی مثال پیش کرسکے، پوری انسانیت کا عملی نمونہ حضرت رسول رحمت صلی اللہ علیہ وسلم کی مبارک زندگی ہے۔ یہ وہ ذات ہے جوہر طرح سے ہر شعبہ زندگی میں مکمل کامیاب ہے اگر ہم بھی مکمل کامیابی حاصل کر نا چاہتے ہے دنیا و آخرت کی چین و سکون والی زندگی گذار نا چاہتے ہے زندگی کے ہر شعبہ میں کامیاب ہو نا چاہتے ہے تو اسوہ نبوی صلی اللہ علیہ وسلم کو اپنا نا لازمی امر ہے یقینا ان کتابوں کو پڑھنے اورپڑھانے سے ہم کو وہ منزل حاصل ہو سکتی ہے۔ہم کو وہ فیوض وبرکات حاصل ہوجائیں گے جو دنیاوآخرت میں ہم کو مقبولیت اور اللہ تعالیٰ کا تقرب دلاسکتا ہے ۔وہی مقبولیت اور تقرب جو ان کتابوں اور ان کے مصنفین کو عطا کیا گیا یہ عظیم دولت بغیر اخلاص کے ، بغیر صحیح نیت کے ، بغیر صحیح عمل کے ،بغیر تبلیغ دین کے ، بغیر مجاہد ے کے،بغیر صحیح طلب کے حاصل نہیں ہوسکتا اورسب سے اہم ادب ہے جو روح کے مانند ہے ،دینی علم بغیر ادب کے حاصل نہیں ہوسکتا۔ جس طرح جسم بغیر جان کے کوئی حیثیت نہیں رکھتا ٹھیک اسی طرح علم بغیر ادب کے وہ مقام نہیں دلاسکتا جو مقصود و مطلوب ہے۔ اللہ تعالیٰ ہم سب کا پڑھنا پڑھاناقبول فرمائیں اوراپنے فضل وکرم سے تکمیل تک پہنچنا آسان فرمائیں تاکہ یہ مبارک علم ہمارے لئے دلیل نجات بن جائے، نہ کہ ہمارے خلاف حجت ۔آمین یارب العالمین۔
٭٭٭
