کرناہ، 27 مئی: کرناہ کے مختلف علاقوں میں شام کے وقت اچانک موسم نے کروٹ لی، جس کے بعد شدید بارش، ژالہ باری اور تیز آندھی نے بڑے پیمانے پر تباہی مچا دی۔ متعدد سڑکیں منہدم ہو گئیں، ندی نالوں کے کنارے زمین کھسکنے سے فصلیں بہہ گئیں اور نظامِ زندگی درہم برہم ہو کر رہ گیا۔مقامی لوگوں کے مطابق شام پانچ بجے کے قریب آسمان پر کالے بادل چھا گئے، اور کچھ ہی دیر میں گرج چمک کے ساتھ شدید بارش اور ژالہ باری شروع ہو گئی۔ نالہ قاضی ناگ، بٹ موجی اور دیگر چھوٹے نالوں میں پانی کے بہاؤ میں اچانک اضافہ دیکھنے میں آیا، جس سے آس پاس کے علاقوں میں خوف و ہراس کی فضا قائم ہو گئی۔خاص طور پر کھڑی فصلوں کو ژالہ باری سے شدید نقصان پہنچا ہے، جس سے مقامی کسان شدید پریشانی میں مبتلا ہیں۔ زمین کھسکنے اور نالوں کی توسیع سے کئی سڑکیں بھی متاثر ہوئی ہیں، جس کے باعث لوگوں کی آمد و رفت میں مشکلات پیش آ رہی ہیں۔اس صورتِ حال پر ردعمل دیتے ہوئے مقامی ممبر اسمبلی کرناہ، جاوید مرچال نے اپنے ایک ٹویٹ میں کہا ہے کہ ان کی کانسچوئنسی میں بارشوں سے زرعی شعبہ بری طرح متاثر ہوا ہے، جبکہ کئی سڑکیں بھی ناکارہ ہو چکی ہیں۔ انہوں نے انتظامیہ کو فوری طور پر سڑکوں کی بحالی اور دیگر ہنگامی اقدامات کی ہدایت دی ہے۔
کرناہ کے متعدد علاقوں میں شدید موسمی قہر فصلیں تباہ، سڑکیں بند،مکانوں میں پانی گھس گیا
