کرناہ // : جموں و کشمیر کے لیفٹیننٹ گورنر منوج سنہا نے آج شمالی کشمیر کے سرحدی علاقے کرناہ کا دورہ کیا، جہاں انہوں نے حالیہ پاکستانی گولہ باری سے ہونے والے جانی و مالی نقصانات کا جائزہ لیا۔ اس موقع پر ان کے ہمراہ ڈویژنل کمشنر کشمیر سمیت دیگر اعلیٰ افسران بھی موجود تھے۔لیفٹیننٹ گورنر نے متاثرہ علاقوں کا دورہ کرنے کے بعد ایک اعلیٰ سطحی اجلاس طلب کیا، جس میں انہیں گولہ باری سے متاثرہ افراد کو فراہم کی جانے والی سہولیات سے متعلق آگاہ کیا گیا۔ انہوں نے افسران کو ہدایت دی کہ متاثرین کو بروقت امداد پہنچائی جائے اور کسی بھی شخص کو کسی قسم کی پریشانی کا سامنا نہ کرنا پڑے۔منوج سنہا نے کہا کہ انسانی سلامتی اولین ترجیح ہے۔ انہوں نے افسران کو ہدایت دی کہ بینکروں (پناہ گاہوں) کی تعمیر کے لیے جلد از جلد ایک جامع منصوبہ تیار کیا جائے، تاہم اس سے قبل گرام سبھا کا انعقاد کر کے یہ یقینی بنایا جائے کہ کوئی بھی غریب یا مستحق فرد اس سہولت سے محروم نہ رہ جائے۔انہوں نے علاقے میں بنیادی سہولیات جیسے بجلی، سڑک، پانی، راشن اور طبی سہولیات کی دستیابی کا بھی جائزہ لیا۔ متعلقہ افسران نے انہیں یقین دلایا کہ ان تمام سہولیات کی فراہمی میں کوئی کمی نہیں ہے۔دورے کے دوران مقامی افراد نے لیفٹیننٹ گورنر کو درپیش مسائل سے آگاہ کیا۔ انہوں نے کہا کہ وہ خطِ غربت سے نیچے زندگی گزار رہے ہیں اور گولہ باری کے پیش نظر انہیں انفرادی بینکروں کی اشد ضرورت ہے۔ مقامی لوگوں نے فائر اینڈ ایمرجنسی سروس کے عملے میں اضافے، مزید گاڑیوں کی فراہمی، اور سب ڈسٹرکٹ اسپتال میں ماہر ڈاکٹروں کی تعیناتی کا بھی مطالبہ کیا۔میڈیا سے گفتگو کرتے ہوئے منوج سنہا نے کہا کہ پاکستان کی اشتعال انگیز گولہ باری سے کئی رہائشی مکانات اور سرکاری املاک کو شدید نقصان پہنچا ہے۔ انہوں نے بتایا کہ نقصانات کا جائزہ لینے کے بعد فوری امداد فراہم کر دی گئی ہے جبکہ متاثرین کی بازآبادکاری کا عمل جاری ہے۔لیفٹیننٹ گورنر نے اعلان کیا کہ مقامی انتظامیہ اور دیگر سینیئر افسران کی مشاورت سے ایک ہمہ گیر منصوبہ تیار کیا جائے گا، جس کی بنیاد پر مرکزی حکومت سے امداد کی باضابطہ درخواست کی جائے گی۔ انہوں نے مزید کہا کہ سرحدی علاقوں میں مورچوں کی تعمیر کے لیے ایک تفصیلی تجویز بھی جلد مرکز کو پیش کی جائے گی تاکہ وہاں رہنے والے شہریوں کی مکمل حفاظت کو یقینی بنایا جا سکے۔