قارئین وادی کشمیر صدیوں سے ملکی اور غیر ملکی سیاحوں کےلئے توجہ کا مرکز رہی ہے اور سیاحتی صنعت یہاں پر نہ صرف معیشت کو استحکام بخشتی ہے بلکہ یہ روزگار کا ایک اہم وسیلہ بھی ہے ۔ قارئین جس طرح دنیا بھر میں سیاحت کو ہمیشہ اقتصادی ترقی، ثقافتی تبادلے اور عالمی ہم آہنگی کا اہم ذریعہ سمجھا گیا ہے۔ اسی طرح قدرتی حسن، تاریخی ورثے اور ثقافتی تنوع سے مالامال خطوں کے لیے سیاحت کی اہمیت دو چند ہو جاتی ہے۔کشمیر جسے بجا طور پر زمین پر جنت کہا جاتا ہے ۔ انہی خوش نصیب علاقوں میں سے ایک ہے۔ ہمالیہ اور پیر پنجال کے عظیم پہاڑی سلسلوں کے درمیان واقع یہ وادی اپنے حسین مناظر، نیلگوں جھیلوں، سرسبز وادیوں اور منفرد روایات کے باعث صدیوں سے سیاحوں کا مرکز رہی ہے۔وادی کشمیر کا ذرہ ذرہ سیاحوں کو اپنی جانب کھینچ لیتا ہے ۔ اگرچہ سیاحت کو نامساعد حالات نے بہت بڑا دھچکہ دیا تھا تاہم گزشتہ چند برسوں میں یہاں سیاحت میں نمایاں اضافہ ہوا ہے، جس نے اس کی معاشی و سماجی اہمیت کو مزید اجاگر کیا ہے۔جیسے کہ پہلے ہی عرض کیا جاچکا ہے کہ کشمیر کی سیاحت نے وقت کے ساتھ کئی نشیب و فراز دیکھے ہیں۔ کبھی یہ دنیا بھر کے سیاحوں کے لیے خوابوں کی وادی تھی، تو کبھی سیاسی بے چینی نے اس کے دروازے محدود کر دیے۔ تاہم، حالیہ برسوں میں حکومتی اقدامات، نجی سرمایہ کاری اور بہتر انتظامی منصوبہ بندی کے باعث ایک بار پھر کشمیر میں سیاحتی سرگرمیاں عروج پر ہیں۔کئی عوامل اس مثبت رجحان کے پیچھے کارفرما ہیں۔ برف سے ڈھکے پہاڑ، شفاف جھیلیں، اور گھنے جنگلات تو کشش کا بنیادی سبب ہیں ہی، مگر ساتھ ہی کشمیر کی تہذیبی اور مذہبی وراثت ،جہاں ہندو، بدھ اور اسلامی ثقافتیں یکجا نظر آتی ہیں — اسے مزید منفرد بناتی ہے۔بہتر سڑکوں، ہوائی روابط، اور جدید مہمان نوازی کے معیارات نے خطے کو پہلے سے زیادہ قابلِ رسائی بنا دیا ہے۔ اب کشمیر کو صرف گرمیوں کا مقامِ سیاحت نہیں بلکہ سردیوں کے تفریحی مرکز کے طور پر بھی پیش کیا جا رہا ہے۔ قارئین گلمرگ میں اسکیئنگ، اسنوبورڈنگ اور برفانی کھیلوں نے ہزاروں نئے سیاحوں کو اپنی جانب متوجہ کیا ہے۔ونٹر گیمز اور واٹر سپورٹس نے کشمیر کو ایک نئی پہنچان دی ہے اور عالمی سطح پر اب کشمیر کا خطہ کھیل کود کی سرگرمیوں کا مرکز بنتا جارہا ہے ۔ جغرافیائی حدود اور صنعتی وسائل کی کمی کے باعث کشمیر میں بھاری صنعتوں کا فروغ محدود رہا ہے، لیکن سیاحت نے اس خلا کو پ ±ر کیا ہے۔یہی شعبہ ہزاروں خاندانوں کا ذریعہ روزگار ہے ۔ چاہے وہ ہوٹل و ریستوران ہوں، ٹرانسپورٹ، دستکاری یا رہنمائی (ٹور گائیڈ) کی خدمات ہوں یا دکاندار ہوں ، چھاپڑی فروش ہوں یا دستکار ہوں ہر شعبہ سیاحت سے بلواسطہ یا بلا واسطہ جڑا ہوا ہے ۔سیاحت نے مقامی سطح پر چھوٹے اور درمیانے کاروبارکو فروغ دیا ہے۔ لوگ گیسٹ ہاو ¿سز، کیفے، دستکاری کی دکانیں اور ٹور اینڈ ٹراول ایجنسیاں چلا کر خود کفیل بن رہے ہیں۔ اس کے اثرات زراعت، ہنرمندی اور تجارت تک پہنچتے ہیں۔مقامی کسان ہوٹلوں کو تازہ پیداوار فراہم کرتے ہیں، اور قالین، شال، اور پیپیئر ماشی جیسی کشمیری دستکاریاں عالمی سطح پر مقبولیت حاصل کر رہی ہیں۔عالمی سیاحوں کی آمد سے زرمبادلہ بھی حاصل ہوتا ہے، جو نہ صرف خطے کی معیشت بلکہ ملک کی مجموعی اقتصادیات کے لیے تقویت کا باعث بنتا ہے۔کشمیر صرف قدرتی حسن نہیں بلکہ ایک زندہ اور قدیم تہذیب کا مرکز بھی ہے۔ یہاں آنے والے سیاح نہ صرف مناظر سے لطف اندوز ہوتے ہیں بلکہ ایک ثقافتی تجربہ سے گزرتے ہیں ۔ کشمیری موسیقی، کھانوں، رقص، زبان اور ہنر سے آشنا ہوتے ہیں۔یہ میل جول دو طرفہ فائدہ دیتا ہے۔ سیاح ایک نئی تہذیب کو سمجھتے ہیں، جبکہ کشمیری عوام کے لیے یہ دنیا سے جڑنے کا پل بن جاتا ہے، جس سے ان میں فخر اور خوداعتمادی پیدا ہوتی ہے۔حکومت اور نجی اداروں کی جانب سے تاریخی عمارتوں، روایتی میلوں، اور فنونِ لطیفہ کے تحفظ کے منصوبے بھی شروع کیے گئے ہیں تاکہ یہ ثقافتی سرمایہ آئندہ نسلوں کے لیے محفوظ رہے۔دنیا بھر میں ماحولیاتی تحفظ کے بڑھتے رجحان کے ساتھ کشمیر میں بھی ایکو ٹورزم (ماحولیاتی سیاحت)کی اہمیت بڑھ رہی ہے۔یہ طرزِ سیاحت ماحول کے تحفظ اور مقامی معیشت کی حمایت پر مبنی ہے۔کشمیر کی متنوع حیاتیاتی ساخت ، نایاب پرندے، جڑی بوٹیاں، اور قدرتی جنگلات ،اس کے لیے مثالی بنیاد فراہم کرتی ہے۔ماحول دوست رہائش گاہیں، جیسے ایکو لاجز اور ہوم اسٹے، مقامی مواد سے تعمیر کی جاتی ہیں، توانائی کے متبادل ذرائع استعمال کرتی ہیں، اور مقامی لوگوں کو روزگار فراہم کرتی ہیں۔یہ رجحان اس بات کی ضمانت ہے کہ سیاحت سے حاصل ہونے والے فوائد ماحول کو نقصان پہنچائے بغیر طویل المدت ترقی میں بدل سکیں۔کشمیر میں سیاحت کے فروغ کے لیے حکومت اور نجی شعبے نے مل کر بنیادی ڈھانچے میں سرمایہ کاری کی ہے۔سرینگر ایئرپورٹ پر پروازوں میں اضافہ، دور دراز علاقوں جیسے پہلگام، سونمرگ اور گلمرگ تک بہتر سڑکیں، اور نئے سیاحتی منصوبوں نے سیاحوں کی آمد آسان بنا دی ہے۔ساتھ ہی انکریڈیبل انڈیاجیسے تشہیری پروگرام، بین الاقوامی ٹورزم میلوں میں شرکت، اور سوشل میڈیا پر مثبت مہمات نے کشمیر کو ایک محفوظ اور خوش آمدیدی منزل کے طور پر اجاگر کیا ہے۔قارئین کشمیر کی سیاحت اب محض تفریح کا ذریعہ نہیں رہی، بلکہ یہ معاشی ترقی، ثقافتی ہم آہنگی اور پائیدار ترقی کا ستون بن چکی ہے۔دنیا بھر میں لوگ اب تجرباتی اور بامعنی سفر چاہتے ہیں، اور کشمیر اپنی فطری خوبصورتی، ورثے اور مہمان نوازی کے باعث ان کے لیے ایک بے مثال تجربہ پیش کرتا ہے۔اگر حکومت، نجی شعبہ اور مقامی برادری باہمی تعاون کے ساتھ اس سمت میں کام جاری رکھیں، تو سیاحت نہ صرف معیشت کو استحکام دے گی بلکہ کشمیر کو عالمی نقشے پر امن و حسن کی علامت بنا دے گی۔اب ضرورت اس بات کی ہے کہ جموں کشمیر سرکار اور مرکزی سرکار وادی کشمیر میں سیاحت کو فروغ دینے کےلئے عملی اقدامات اُٹھائیں اور سیاحوں کو زیادہ سے زیادہ خطے کی طرف متوجہ کرنے کےلئے تشہیری پروگرام چلائیں تاکہ سیاحت جو کشمیر کی معاشی لحاظ سے ریڈ کی ہڈی تصور کی جاتی ہے کو مزید استحکام ملے ۔
