قارئین قریب گزشتہ تین دہائیوں سے بھی زیادہ عرصہ تک وادی کشمیر معاشی لحاظ سے کافی کمزور رہی کیوں کہ سیاسی خلفشار اور دگرگوں حالات نے یہاں کی معیشت کو کافی نقصان پہنچایا تھا تاہم جموں و کشمیر میں حالیہ برسوں کے دوران معاشی ڈھانچے کو ازسرِنو مضبوط بنانے کے لیے حکومت نے کئی اہم اقدامات کیے ہیں۔ انتظامیہ کا مقصد یہ ہے کہ مقامی صنعت کو نہ صرف سہارا دیا جائے بلکہ اسے ایسے راستے بھی دکھائے جائیں جن سے کشمیر قومی ہی نہیں بلکہ عالمی منڈیوں میں بھی مضبوط مقابل بن کر ابھرے۔ اسی حکمتِ عملی کا مرکزی ستون وہ نئے ایکسپورٹ ٹارگٹس ہیں جو حکومت نے بڑے اعتماد کے ساتھ طے کیے ہیں۔یہ پالیسی خطے کے قدرتی وسائل اور صدیوں پرانی دستکاری کی روایت کو بنیاد بناتی ہے۔ صنعتی پالیسی کے حصے کے طور پر اعلان کردہ یہ سالانہ ایکسپورٹ اہداف مقامی مصنوعات کو عالمی منڈی تک پہنچانے کے لیے واضح سمت فراہم کرتے ہیں۔ کشمیری دستکاریاں، باغبانی اور زرعی پیداوار کو خاص طور پر اس فہرست میں نمایاں مقام ملا ہے، تاکہ وہ عالمی سطح پر ایک شناخت قائم کر سکیں۔اس سے پہلے اگرچہ یہاں سے بیرون ممالک اشیاءپہنچائی جاتی تھی تاہم ایکسپورٹ کےلئے وہ مواقعے دستیاب نہیں تھے ۔ ان نئے اہداف سے سب سے زیادہ فائدہ ا ±ن شعبوں کو ہو رہا ہے جو پہلے ہی عالمی خریداروں میں مقبول تھے۔ کشمیری شالیں، قالین اور لکڑی کا کام بین الاقوامی منڈی میں خاص کشش رکھتے ہیں۔ حکومت نے ان مصنوعات کی معیار بندی، سرٹیفکیشن اور جغرافیائی شناخت جی آئی ٹیگ کے عمل کو مضبوط کیا ہے، جس سے ان کی برآمدی قدر میں نمایاں اضافہ ہوا ہے۔کشمیر میں تیار کردہ مصنوعات کی عالمی سطح پر ایک پہنچان بن گئی اور اس سے عالمی سطح پر ان کی مانگ بڑھنے لگی ہے جس کا براہ راست فائدہ مقامی تاجروں اور صنعت کاروں کو مل رہا ہے ۔ اسی طرح باغبانی کے شعبے میں کشمیر کی روایتی برتری،سیب، چیری، زعفران، خشک میوہ جات اور اخروٹ،کو جدید کولڈ چین، پیکجنگ ٹیکنالوجی اور کسانوں کی تربیت کے ذریعے نئی توانائی ملی ہے، جس سے مصنوعات کی شیلف لائف اور ایکسپورٹ ریڈی نیس بہتر ہوئی ہے۔باغبانی کے شعبے میں گزشتہ چند برسوں کے دوران نمایاں بہتری کا مشاہدہ کیا جارہا ہے کیوں کہ یہاں پر کاشت ہونے والی اشیاءکو اب نہ صرف ملکی منڈیوں بلکہ بیرون ممالک منڈیوں تک آسان رسائی ممکن ہوئی ہے ۔ قارئین جموں کشمیر کے مختلف حصوں میں مختلف اشیاءکی کاشت ہوتی ہے جن میں مختلف اقسام کی چاول بھی شامل ہے ۔ باسمتی چاول کی قسم کی دوبارہ کاشت اور نامیاتی پیداوار میں توسیع بھی اعلیٰ معیار کے عالمی معیار پر پورا اترنے کے لیے اہم ثابت ہو رہی ہے۔جبکہ دیگر اقسام کی چاول جن میں ”موشک بدجی“ کو بھی دوبارہ کاشت کیا جارہا ہے ۔دوسری جانب ٹیکنالوجی پارکس اور ڈیجیٹل تعلیم کے فروغ نے کشمیر میں آئی ٹی اور سافٹ ویئر ایکسپورٹ کی بنیادیں مضبوط کی ہیں، جس سے تعلیم یافتہ نوجوانوں کے لیے نئی راہیں کھل رہی ہیں۔ اسی طرح سیاحت سے جڑی مخصوص مصنوعات، سووینیئرز اور خصوصی خوراک کو بھی اب عالمی سطح پر متعارف کرانے کی کوششیں جاری ہیں۔مقامی پیداوار میں تکنیکی اپ گریڈیشن اور صاف ستھرے پیداواری عمل کی حوصلہ افزائی کی جا رہی ہے۔ جو یونٹس ایکسپورٹ کے سخت معیارات پورے کرنے میں کامیاب ہو رہے ہیں، ان کی پیداواریت میں اضافہ اور ضیاع میں کمی دیکھنے میں آئی ہے۔ حکومت نے تعلیمی اداروں اور صنعتی انجمنوں کے ساتھ مل کر وہ تربیتی پروگرام بھی تیار کیے ہیں جو ایکسپورٹ ڈاکیومنٹیشن، بین الاقوامی معیار اور ڈیجیٹل مارکیٹنگ جیسے اہم مراحل پر مبنی ہیں۔ایکسپورٹ سرگرمیوں میں اضافے کا ایک بڑا فائدہ روزگار کے نئے مواقع ہیں۔ دستکاروں سے لے کر کسانوں تک اور نوجوانوں سے لے کر چھوٹے کاروباریوں تک سب کے لیے روزگار کے امکانات بڑھ رہے ہیں۔ فریٹ کوریڈورز، بہتر سڑکیں اور کارگو سہولیات سے لیس ہوائی اڈوں نے عالمی منڈیوں تک رسائی کو تیز اور مو ¿ثر بنایا ہے۔ سلام آباد اور چکّن دا باغ جیسے تجارتی راستوں پر سہولیات میں بہتری سے ہمسایہ ممالک کے ساتھ تجارت میں بھی آسانی پیدا ہوئی ہے۔برآمدات کے لیے قرضوں پر سود میں چھوٹ، نئی ٹیکنالوجی کے لیے سبسڈیز، اور ایکسپورٹ پر کم جی ایس ٹی جیسے اقدامات نے چھوٹے اور درمیانی درجے کے کاروباروں کو ترقی کی نئی سمت دکھائی ہے۔ مجموعی طور پر، یہ ایکسپورٹ ہدف جموں و کشمیر کی معاشی بحالی کا نیا باب ثابت ہو رہا ہے۔ برآمدات میں اضافہ نہ صرف غیر ملکی زرمبادلہ لاتا ہے بلکہ خطے کی مالی صحت بھی بہتر کرتا ہے۔ معیار، سرٹیفکیشن اور برانڈنگ پر زور دینے سے کشمیر کی مصنوعات کی عالمی پہچان مضبوط ہوتی ہے، جو ملکی و غیر ملکی سرمایہ کاری کو بھی متوجہ کرتی ہے۔ سب سے بڑھ کر یہ کہ ایکسپورٹ پر انحصار مقامی صنعت کو اندرونی منڈی کی اتار چڑھاو ¿ سے محفوظ بناتا ہے۔جموں و کشمیر کا مستقبل ایک ایسے خود کفیل اور خوشحال خطے کی صورت میں دیکھا جا رہا ہے جہاں مقامی صنعت، اختراع اور کاروبار معاشی ترقی کی بنیاد ہوں گے۔ یہ ایکسپورٹ ٹارگٹس محض اعداد و شمار نہیں بلکہ ایک بڑے سماجی و معاشی تحول کی علامت ہیں۔ عالمی سطح پر مضبوط موجودگی، اعلیٰ معیار اور تسلسل کے ساتھ مارکیٹ تک رسائی، نہ صرف معیشت بلکہ معاشرے میں بھی دیرپا استحکام کا باعث بن سکتی ہے۔ مسلسل سرمایہ کاری، شعبہ وار اصلاحات اور سازگار ماحول کے ساتھ جموں و کشمیر اپنی صنعتی کہانی کو ازسرِنو تحریر کرنے کی سمت بڑھ رہا ہے۔ضرورت اس بات کی ہے کہ جموں کشمیر کی مصنوعات چاہئے وہ کاشتکاری سے جڑی ہوں یا دستکاری کی مصنوعات ہوں ، ان کو بین القوامی منڈیوں تک پہنچانے کےلئے مزید اقدامات اُٹھائے جائیں ۔
