تین ہفتوں تک کھیلوں، ثقافتی سرگرمیوں اور نوجوانوں کی بھرپور شرکت نے میلے کو یادگار بنایا
پیرزادہ سعید
کیرن //کیرن میں تین ہفتوں سے جاری کیرن میلہ 2026 اتوار کے روز شاندار اختتامی تقریب کے ساتھ اختتام پذیر ہوگیا۔ میلے کا انعقاد بھارتی فوج، ضلعی انتظامیہ کپواڑہ، محکمہ سیاحت اور دیگر سول محکموں کے اشتراک سے کیا گیا، جس میں مقامی نوجوانوں، خواتین، طلبہ اور عوام نے بھرپور شرکت کی۔
اختتامی تقریب میں وَجر ڈویژن کے جنرل آفیسر کمانڈنگ (GOC) نے بطور مہمانِ خصوصی شرکت کی اور مختلف کھیلوں میں نمایاں کارکردگی کا مظاہرہ کرنے والی فاتح اور رنر اَپ ٹیموں سمیت دیگر شرکاء کو اعزازات سے نوازا۔
کیرن میلہ کے دوران کرکٹ، والی بال، 10 کلومیٹر ’’رن فار فن‘‘، کھوکھو، ایتھلیٹکس، رسہ کشی اور دیگر ثقافتی سرگرمیوں کا انعقاد کیا گیا۔ ان مقابلوں میں کیرن باؤل اور ملحقہ علاقوں کے نوجوانوں نے جوش و خروش کے ساتھ حصہ لیا۔
اس موقع پر خطاب کرتے ہوئے GOC وَجر ڈویژن نے بھارتی فوج، ضلعی انتظامیہ، محکمہ سیاحت، سول محکموں، منتظمین، رضاکاروں اور مقامی عوام کی مشترکہ کوششوں کو سراہا۔ انہوں نے کہا کہ کیرن میلہ نے کھیل، سیاحت، نوجوانوں کی سرگرمیوں اور عوامی شرکت کو ایک مشترکہ پلیٹ فارم فراہم کیا ہے۔
ڈپٹی کمشنر کپواڑہ شری کانت بالاصاحب سوسے، آئی اے ایس نے بھی تقریب سے خطاب کرتے ہوئے کیرن میلہ کے کامیاب انعقاد پر بھارتی فوج اور ضلعی انتظامیہ کی مشترکہ کاوشوں کو سراہا۔ انہوں نے کہا کہ اس طرح کی سرگرمیوں سے نہ صرف کیرن میں سیاحت کو فروغ ملتا ہے بلکہ مقامی نوجوانوں کو اپنی صلاحیتیں اجاگر کرنے اور مختلف کھیلوں میں آگے بڑھنے کے مواقع بھی فراہم ہوتے ہیں۔
ڈپٹی کمشنر نے کہا کہ میلے میں وادی کے مختلف علاقوں سے نوجوان کھلاڑیوں اور ٹیموں کی شرکت سے کیرن کی جانب لوگوں کی توجہ مزید بڑھی ہے۔ انہوں نے نوجوانوں کو کھیلوں میں بڑھ چڑھ کر حصہ لینے کی ترغیب دی۔
میلے کے دوران خواتین اور نوجوان لڑکیوں کی کھیلوں کی سرگرمیوں میں شرکت بھی نمایاں رہی، جسے مقامی سطح پر خواتین کی کھیلوں میں بڑھتی دلچسپی کے طور پر دیکھا گیا۔
تین ہفتوں تک جاری رہنے والے اس میلے نے مقامی نوجوانوں کو کھیلوں کے ذریعے ایک دوسرے کے قریب آنے، اپنی صلاحیتوں کا مظاہرہ کرنے اور باہمی ہم آہنگی کو فروغ دینے کا موقع فراہم کیا۔
اختتامی تقریب میں فاتح اور رنر اَپ ٹیموں، کھلاڑیوں، منتظمین اور دیگر معاونین کو اعزازات سے نوازا گیا۔ مقررین نے امید ظاہر کی کہ کیرن میلہ مستقبل میں بھی کیرن میں کھیلوں، سیاحت اور نوجوانوں کی سرگرمیوں کے فروغ میں اہم کردار ادا کرے گا
