کرناہ، 26 جون: سرحدی سب ڈویژن کرناہ میں جمعہ کے روز گنڈی سیداں سے چمکوٹ تک حضرت امام حسینؑ اور شہدائے کربلا کی عظیم قربانی کی یاد میں ایک پُرامن محرم جلوس نکالا گیا، جس میں بڑی تعداد میں عزاداروں نے شرکت کی۔
جلوس اپنے مقررہ راستے سے انتہائی نظم و ضبط کے ساتھ گزرا، جہاں عزاداروں نے نوحہ خوانی اور ماتم کرتے ہوئے واقعۂ کربلا کے شہداء کو خراجِ عقیدت پیش کیا۔ جلوس میں گنڈی سیداں، چمکوٹ اور ملحقہ علاقوں سے تعلق رکھنے والے مرد، خواتین اور نوجوان شریک ہوئے۔
اس موقع پر علمائے کرام نے حضرت امام حسینؑ کی حیاتِ مبارکہ اور واقعۂ کربلا کی اہمیت پر روشنی ڈالتے ہوئے کہا کہ امام حسینؑ کی قربانی حق، انصاف، صبر، استقامت اور ظلم کے خلاف ڈٹ جانے کا لازوال پیغام دیتی ہے۔ انہوں نے کہا کہ کربلا کا پیغام آج بھی پوری انسانیت کے لیے مشعلِ راہ ہے۔
جلوس کے پُرامن انعقاد کو یقینی بنانے کے لیے سول انتظامیہ اور جموں و کشمیر پولیس کی جانب سے سکیورٹی اور ٹریفک کے مناسب انتظامات کیے گئے تھے۔ مقامی رضاکاروں نے بھی جلوس کے دوران عزاداروں کی رہنمائی، نظم و ضبط برقرار رکھنے اور دیگر سہولیات کی فراہمی میں اہم کردار ادا کیا۔
جلوس اختتام پذیر ہونے پر ملک و قوم، جموں و کشمیر میں امن، بھائی چارے اور خوشحالی کے لیے خصوصی دعائیں کی گئیں۔ مقامی لوگوں نے جلوس کے کامیاب اور پُرامن انعقاد پر انتظامیہ، پولیس اور رضاکاروں کے باہمی تعاون کو سراہتے ہوئے امید ظاہر کی کہ آئندہ بھی مذہبی اجتماعات اسی بھائی چارے اور باہمی احترام کے ماحول میں منعقد ہوتے رہیں گے
گنڈی سیداں سے چمکوٹ، کرناہ تک پُرامن محرم جلوس برآمد، عقیدت مندوں کی بڑی تعداد کی شرکت
