سری نگر، 27 اگست: فوڈ اینڈ ڈرگس ایڈمنسٹریشن (FDA) جموں و کشمیر نے جموں و کشمیر کے تمام سرکاری و نجی اسکولوں میں فوڈ سیفٹی اینڈ اسٹینڈرڈز (اسکول میں بچوں کے لیے محفوظ خوراک اور متوازن غذا) ریگولیشنز، 2020 پر سختی اور مؤثر انداز میں عملدرآمد یقینی بنانے کی ہدایت دی ہے۔
ڈائریکٹرز اسکول ایجوکیشن، جموں و کشمیر کے نام جاری ایک مکتوب میں ایف ڈی اے نے مذکورہ ضوابط کی مکمل پابندی یقینی بنانے پر زور دیا ہے۔ ان ضوابط کا مقصد تعلیمی اداروں کے اندر اور اطراف میں بچوں کو محفوظ، حفظانِ صحت کے اصولوں کے مطابق اور غذائیت سے بھرپور متوازن خوراک کی دستیابی یقینی بنانا اور طلبہ کی صحت و بہبود کا تحفظ کرنا ہے۔
ضابطہ 3(5) کے تحت اسکول انتظامیہ اس بات کو یقینی بنائے گی کہ اسکول کے احاطے یا کیمپس میں ایسی غذائی اشیاء فروخت یا مفت فراہم نہ کی جائیں جن میں سیر شدہ چکنائی، ٹرانس فیٹ، اضافی شکر یا سوڈیم کی مقدار زیادہ ہو، یعنی جنہیں عام طور پر جنک فوڈ کہا جاتا ہے۔
اسی طرح ضابطہ 5(1) کے مطابق اسکول کی حدود کے اندر یا اسکول کے مرکزی دروازے سے کسی بھی سمت میں 50 میٹر کے فاصلے تک ایسی غذائی اشیاء کی تشہیر، مارکیٹنگ، فروخت یا مفت فراہمی کی اجازت نہیں ہوگی۔
ضابطہ 3(1) کے تحت اگر اسکول انتظامیہ خود اسکول کیمپس میں کھانا فروخت یا فراہم کرتی ہے، یا کوئی فوڈ بزنس آپریٹر (FBO) اسکول میں کھانے کی فراہمی کرتا ہے، تو متعلقہ فوڈ بزنس آپریٹر کا فوڈ سیفٹی اینڈ اسٹینڈرڈز ایکٹ، 2006 کے تحت رجسٹرڈ یا لائسنس یافتہ ہونا لازمی ہے۔
ایسے اداروں کو فوڈ سیفٹی اینڈ اسٹینڈرڈز (لائسنسنگ اینڈ رجسٹریشن آف فوڈ بزنسز) ریگولیشنز، 2011 کے شیڈول 4 کے تحت مقررہ صفائی اور حفظانِ صحت کے اصولوں پر عملدرآمد کے ساتھ ساتھ فوڈ سیفٹی ڈسپلے بورڈ اور فوڈ سیفٹی سپروائزرز سے متعلق تقاضے بھی پورے کرنا ہوں گے۔
ضوابط میں اسکولوں میں کھانے کے لیے مقررہ اوقات کا تعین بھی لازمی قرار دیا گیا ہے تاکہ بچوں میں صحت مند غذا اور متوازن خوراک کی عادات پروان چڑھائی جا سکیں۔ اس کے علاوہ تمام طلبہ کو صاف اور محفوظ پینے کا پانی مفت فراہم کرنا بھی یقینی بنانا ہوگا۔
ضوابط کے مطابق اسکول اتھارٹی سے مراد ادارے کا سربراہ، بشمول پرنسپل یا ہیڈ ماسٹر، نیز گورننگ باڈی، ٹرسٹ یا اسکول کے انتظام و انصرام کی ذمہ دار کوئی بھی متعلقہ تنظیم یا ادارہ ہے۔ اسکول انتظامیہ کو کھانے کی جگہوں کا باقاعدہ معائنہ کرنے کا نظام بھی قائم کرنا ہوگا تاکہ طلبہ کو محفوظ، متوازن اور حفظانِ صحت کے اصولوں کے مطابق خوراک فراہم کی جاسکے۔
اسکول اتھارٹی ہیلتھ اینڈ ویلنس ایمبیسیڈر مقرر کرسکتی ہے یا ہیلتھ اینڈ ویلنس ٹیم تشکیل دے سکتی ہے، جو اسکول میں محفوظ، متوازن اور حفظانِ صحت کے اصولوں کے مطابق خوراک کی دستیابی کی نگرانی کے لیے نوڈل میکانزم کے طور پر کام کرے گی۔
ایف ڈی اے نے اسکول ایجوکیشن ڈیپارٹمنٹ اور تمام متعلقہ اسکول اتھارٹیز پر زور دیا ہے کہ جموں و کشمیر کے تمام سرکاری و نجی اسکولوں میں مذکورہ ضوابط کی سختی سے پابندی اور مؤثر عملدرآمد یقینی بنایا جائے۔
