وہاب کلچرل سوسائٹی حاجن اور محکمۂ اسکول ایجوکیشن باڈی پورہ کے زیرِ اہتمام ڈاکٹر عزیز حاجنی کی پانچویں برسی پر متاثر کن یوتھ کوئز اور ادبی اجتماع
حاجن، سوناواری | 12 ستمبر:
کشمیری زبان و ادب کے عظیم ادیب، ممتاز نقاد، مصنف، زبان کے سرگرم کارکن اور جموں و کشمیر اکیڈمی آف آرٹ، کلچر اینڈ لینگویجز (JKAACL) کے سابق سیکریٹری ڈاکٹر عزیز حاجنی کی پانچویں برسی ہفتہ کے روز نہایت عقیدت و احترام کے ساتھ منائی گئی۔
یہ یادگاری تقریب وہاب کلچرل سوسائٹی (WCS) حاجن نے محکمۂ اسکول ایجوکیشن بانڈی پورہ کے اشتراک سے منعقد کی۔ تقریب میں سینکڑوں طلبہ و طالبات، اساتذہ، ماہرینِ تعلیم، ادیبوں اور سول سوسائٹی کے سرکردہ افراد نے شرکت کی اور ڈاکٹر عزیز حاجنی کو شاندار خراجِ عقیدت پیش کیا۔ مقررین نے کشمیری زبان، ادب اور ثقافتی ورثے کے تحفظ و فروغ کے لیے ان کی گراں قدر خدمات کو اجاگر کیا۔
ڈاکٹر عزیز حاجنی کی ادبی اور علمی خدمات کا دائرہ نہایت وسیع تھا۔ وہ ادبی مرکز کمراز، جو کشمیر کی ایک بڑی ادبی تنظیم ہے، کے سابق صدر بھی رہے۔ اس کے علاوہ انہوں نے جموں و کشمیر بورڈ آف اسکول ایجوکیشن، ڈائریکٹوریٹ آف اسکول ایجوکیشن کشمیر، یونیورسٹی آف کشمیر اور ساہتیہ اکیڈمی نئی دہلی سمیت متعدد اہم اداروں کے ساتھ وابستہ رہ کر اپنی خدمات انجام دیں۔
تقریب کا آغاز وہاب کلچرل سوسائٹی حاجن کے سرپرست نذیر جاوید کے استقبالیہ خطاب سے ہوا۔ اس کے بعد معروف شاعر و ادیب شہباز ہاکہ باری نے کلیدی خطاب پیش کیا اور ڈاکٹر عزیز حاجنی کی تعلیم، ادب اور عوامی زندگی کے مختلف شعبوں میں نمایاں خدمات پر روشنی ڈالی۔
تقریب کی صدارت حلقۂ ادب سوناواری کے صدر شاکر شفیع نے کی، جبکہ سینئر JKAS افسر اور چیف اکاؤنٹس آفیسر کشمیر پاور ڈیولپمنٹ کارپوریشن، ارشد احمد لون نے بطور مہمانِ اور چیف ایجوکیشن آفیسر بانڈ ی پورہ رفیق احمد میر خصوصی شرکت کی۔ اس موقع پر زونل ایجوکیشن آفیسر حاجن بھی صدرِ مجلس کے ساتھ موجود تھے۔
انجینئر فرحان منظور شاہ، صوبائی سیکریٹری JKEEGA و ایڈیشنل سیکریٹری NIT Alumni Association، اور عزیز حاجنی کے فرزند اظہر حاجنی، معروف براڈکاسٹر، ٹیلی ویژن پریزنٹر اور میڈیا سیکریٹری حلقۂ ادب سوناواری نے بھی اپنی معزز موجودگی سے تقریب کو وقار بخشا۔
تقریب کا ایک اہم اور دلچسپ حصہ ڈاکٹر عزیز حاجنی یوتھ کوئز تھا، جس کا مقصد نئی نسل کو ڈاکٹر حاجنی کی ادبی و علمی خدمات اور کشمیری زبان و ادب کی جڑوں سے روشناس کرانا تھا۔ حاجن کے پانچ مختلف اسکولوں کے طلبہ نے بھرپور جوش و خروش اور مسابقتی جذبے کے ساتھ حصہ لیا۔ان میں پی ایم شری مڈل اسکول گلشن آباد، مڈل اسکول گھاٹ،مڈل اسکول بخشی بل،)مڈل اسکول بونہ پورہ شاہ گنڈ، اور مڈل اسکول پرے محلہ حاجن شامل تھے۔
وہاب کلچرل سوسائٹی کے جنرل سیکریٹری مجید مجازی نے بحیثیت کوئز ماسٹر کوئز کے مراحل کو نہایت دلچسپ اور مؤثر انداز میں آگے بڑھایا، جس سے طلبہ کے ساتھ ساتھ حاضرین بھی پوری طرح محظوظ اور متوجہ رہے۔
کوئز مقابلے میں مڈل اسکول شاہ گنڈ اور PM SHRI گورنمنٹ مڈل اسکول گلشن آباد حاجن نے مشترکہ طور پر پہلی پوزیشن حاصل کی۔ مڈل اسکول پرے محلہ نے دوسری جبکہ مڈل اسکول بلشی بل نے تیسری پوزیشن حاصل کی۔
تقریب میں سول سوسائٹی کے متعدد سرکردہ افراد، جن میں ڈاکٹر ریاض الحسن، صدر وہاب کلچرل سوسائٹی، حاجی غلام نبی ڈار، ساگر سرفراز، محمد یعقوب پرے, منتظر منیراور مہراج الدین پرے کے علاوہ بڑی تعداد میں ماہرینِ تعلیم، ادباء اور ادب دوست شخصیات شامل تھیں، نے شرکت کی۔ اس موقع پر شیخ غلام محمد، مجید مجازی اور غلام نبی شاہین کی عزت افزائی کی۔گئی۔ اور ریاض الحسن کا تحریر کردہ مڈل اسکول گلشن آباد کا ترانہ بھی اجراء کیا گیا ہے
تقریب کی نظامت کے فرائض ساگر سرفراز نے انجام دیے۔
تقریب کے اختتام پر ادبی و تعلیمی حلقوں نے اس عزم کا اعادہ کیا کہ ڈاکٹر عزیز حاجنی کے مشن کو آگے بڑھاتے ہوئے کشمیری زبان و ادب کے تحفظ و فروغ، ثقافتی ورثے کی پاسداری اور نئی نسل کو تعلیم و ثقافتی شعور سے آراستہ کرنے کے لیے اپنی کوششیں جاری رکھی جائیں گی۔
تحریک شکرانہ منظور احمد منظور نے پیش کیا۔