کرناہ // کرناہ کے کرانو جنگلات کمپارٹمنٹ نمبر 30 میں لگی جنگل کی آگ بجھانے کے دوران دو مقامی افراد زخمی ہو گئے۔ یہ واقعہ اس وقت پیش آیا جب مقامی لوگ آگ پر قابو پانے کی کوشش کر رہے تھے تاکہ اسے مزید پھیلنے سے روکا جا سکے۔زخمی ہونے والوں کی شناخت جمیل احمد ولد مرحوم شبیر احمد شیخ اور جعفر میر ولد یوسف میر ساکنان چنی پورہ بالا کے طور پر ہوئی ہے۔ دونوں افراد جنگل کی آگ بجھانے کے دوران زخمی ہو گئے.اس آگ پر قابو پانے کے لیے محکمہ جنگلات کے اہلکار بھی موقع پر موجود تھے، لیکن کرناہ سب ڈویژن میں جنگلات کے عملے کی شدید کمی کی وجہ سے آگ بجھانے میں مشکلات کا سامنا کرنا پڑا۔ ایک جنگلاتی افسر نے کہا، “ہمارے عملے کی تعداد ناکافی ہے، جس کی وجہ سے ہمیں مقامی لوگوں کی مدد لینا پڑی۔ لیکن خشک موسم کی شدت نے حالات کو مزید پیچیدہ بنا دیا۔”محکمہ جنگلات کے افسر نے بتایا کہ یہ واقعہ علاقے میں جاری خشک موسم کی وجہ سے پیش آیا، جو جنگلات میں آگ لگنے کے واقعات میں اضافے کا سبب بن رہا ہے۔ “جنگل کے خشک پتوں اور ٹہنیوں نے آگ کو مزید بھڑکایا، اور عملے کی کمی کے باعث آگ پر قابو پانے کے لیے مقامی لوگوں کی مدد لینا ضروری ہو گیا۔”
علاقے کے لوگوں نے زخمی افراد اور جنگلات کے اہلکاروں کی بہادری کو سراہتے ہوئے افسوس کا اظہار کیا اور حکومت سے مطالبہ کیا کہ کرناہ سب ڈویژن میں مزید عملہ تعینات کیا جائے تاکہ اس قسم کے حادثات سے بچا جا سکے۔ “یہ لوگ اپنی جان پر کھیل کر جنگل کو بچانے کی کوشش کر رہے تھے۔ ہمیں ان کی بہادری پر فخر ہے، لیکن عملے کی کمی کے باعث ان کی جانوں کو خطرہ لاحق ہو رہا ہے،” ایک مقامی باشندے نے کہا۔محکمہ جنگلات نے عوام سے اپیل کی ہے کہ وہ جنگلات میں احتیاط برتیں اور آگ لگنے کی کسی بھی علامت کی فوری اطلاع متعلقہ حکام کو دیں تاکہ اس طرح کے حادثات کو روکا جا سکے۔ رینج افسر کرناہ نے بتایا کہ محکمہ کو پوری طرح سے متحرک رکھا گیا ہے اور مقامی لوگوں کی خدمات بھی انجام دی جا رہی ہیں ۔انہوں نے کہا کہ محکمہ کی کوشش ہے کہ جنگلات میں درختوں کو کم نقصان ہو
