کرناہ//بلاک چھمکوٹ کے متعدد علاقوں میں پینے کے صاف پانی کی شدید قلت نے عوام کو شدید مشکلات سے دوچار کر دیا ہے۔ گزشتہ روز ٹیٹوال میں مقامی لوگوں نے سڑک بند کر کے محکمہ آبرسانی کے خلاف زبردست احتجاج کیا۔ مظاہرین نے مطالبہ کیا کہ فوری طور پر پانی کی فراہمی یقینی بنائی جائے تاکہ عوام کو درپیش پریشانیوں کا ازالہ ہو سکے۔مظاہرین کا کہنا تھا کہ پانی جیسی بنیادی سہولت سے محرومی ان کے لیے ایک عذاب بن چکی ہے اور روزمرہ زندگی شدید متاثر ہو رہی ہے۔مقامی سماجی کارکن سجاول شاہ نے اس موقع پر بتایا کہ انہوں نے متعدد بار اس سنگین مسئلے کی طرف حکام کی توجہ مبذول کرانے کی کوشش کی، تاہم اس سلسلے میں کوئی ٹھوس اقدام نہیں کیا گیا۔ ان کا کہنا تھا کہ علاقے کے لوگ بوند بوند پانی کے لیے ترس رہے ہیں لیکن انتظامیہ کی جانب سے کوئی خاطرخواہ پیش رفت دیکھنے کو نہیں ملی انہوں نے کہا کہ کرناہ کے ٹیٹوال درنگلہ ، ایبکوٹ، چترکوٹ، گھنڈی شاتھ، تھمڑیاں، کڑھامہ، سیماری سمیت کئی دیہات گزشتہ کئی دنوں سے پانی کی شدید قلت کا سامنا کر رہے ہیں، جس کی وجہ سے عوام میں سخت غم و غصہ پایا جا رہا ہے انہوں نے انتظامیہ اور محکمہ جل شکتی سے اپیل کی ہے کہ فوری طور پر اس مسئلے کا نوٹس لے کر بلا تاخیر پانی کی فراہمی کے اقدامات کیے جائیں، تاکہ عوام کو مزید مشکلات کا سامنا نہ کرنا پڑے۔
