وادی کشمیر جہاں ایک طرف فطرت کی حسین کاریگری کے لیے دنیا بھر میں مشہور ہے، وہیں دوسری طرف دہائیوں سے ایک بڑی بنیادی سہولت، یعنی جدید اور مسلسل سفری رابطے سے محروم رہی ہے۔ گھنے پہاڑ، گہری کھائیاں اور برف سے ڈھکے راستے اکثر یہاں کے لوگوں کو ملک کے باقی حصوں سے کاٹ دیتے ہیں۔ لیکن اب یہ منظرنامہ بدل رہا ہے۔ جموں و کشمیر میں ریلوے کے شعبے میں جو انقلابی تبدیلیاں رونما ہو رہی ہیں، وہ محض لوہے کی پٹڑیوں اور اسٹیشنوں کی تعمیر سے کہیں بڑھ کر ایک نئے دور کی آمد کا اعلان ہیں۔ یہ پروجیکٹس نہ صرف خطے کو بھارت کے مرکزی ریل نیٹ ورک سے جوڑنے کے لیے اہم ہیں بلکہ معیشت، سیاحت اور عسکری نقل و حرکت کے لیے بھی بے حد اسٹریٹجک حیثیت رکھتے ہیں۔ادھم پور،سرینگر،بارہمولہ ریل پروجیکٹ کو اس پورے انقلابی عمل کی ریڑھ کی ہڈی کہا جائے تو غلط نہ ہوگا۔ 272 کلومیٹر طویل یہ ریلوے لائن، جس پر تقریباً 41 ہزار کروڑ روپے لاگت آئے گی، وادی کو باقی بھارت سے جوڑنے والی ایک مستحکم اور موسمیاتی چیلنجوں سے نمٹنے کی صلاحیت رکھنے والی راہ فراہم کرے گی۔ پہاڑی چٹانوں کو کاٹ کر بنائے گئے سرنگوں اور ندیوں پر تعمیر کردہ دنیا کے سب سے بلند ریلوے پل، یعنی دریائے چناب پر واقع پل، اس منصوبے کو انجینئرنگ کا ایک شاہکار بناتے ہیں۔ پیر پنجال سرنگ، جو ہندوستان کی سب سے طویل ریلوے سرنگ ہے، اس منصوبے کا ایک اور اہم پہلو ہے۔ ان دونوں تعمیراتی عجوبوں کی تکمیل سے جموں سے کشمیر تک کا سفر محض گھنٹوں میں طے ہو سکے گا، جو پہلے دنوں پر محیط ہوتا تھا۔ریاستی حکومت اب شمالی کشمیر کے دور افتادہ ضلع کپواڑہ کو بھی ریلوے کے دائرے میں لانے کی کوشش کر رہی ہے۔ 39 کلومیٹر طویل یہ توسیعی منصوبہ علاقائی تجارت، تعلیم اور سیاحت کے لیے ایک نئی کھڑکی کھول سکتا ہے۔ اسی طرح اننت ناگ سے پہلگام تک مجوزہ ریل لائن، جو ایک سیاحتی مرکز ہے، وادی کے قدرتی مقامات تک آسان رسائی فراہم کرے گی اور سیاحتی معیشت کو فروغ دے گی۔اس پیش رفت کے بیچ سب سے زیادہ دل چسپ اعلان یہ ہے کہ جنوری 2025 سے دہلی سے سری نگر کے درمیان وندے بھارت سلیپر ٹرین کا آغاز ہو رہا ہے۔ اس ٹرین کے ذریعے مسافر محض تیرہ گھنٹوں میں دہلی سے سری نگر کا فاصلہ طے کر سکیں گے، وہ بھی ایک آرام دہ رات کے سفر میں۔ یہ سروس مسافروں کو وقت، محنت اور اخراجات میں کمی کی سہولت دے گی اور بلاشبہ دہلی اور وادی کے درمیان سماجی و تجارتی روابط کو نئی توانائی دے گی۔ان منصوبوں کی حکمت عملیاتی اہمیت بھی کسی سے ڈھکی چھپی نہیں۔ برسوں تک وادی میں زمینی راستے محدود اور موسم کے رحم و کرم پر تھے۔ نئی ریل لائنیں نہ صرف شہریوں کو بہتر نقل و حرکت فراہم کریں گی بلکہ فوجی نقل و حرکت کے لیے بھی یہ ایک محفوظ اور مستحکم متبادل ثابت ہوں گی۔ اس کے ساتھ ہی مقامی سطح پر روزگار کی ایک نئی لہر اٹھ چکی ہے۔ تعمیراتی مراحل میں ہزاروں نوجوان مزدور، انجینئر اور ٹیکنیکل عملے کی شکل میں شامل ہو چکے ہیں اور مستقبل میں اسٹیشن، ہوٹل، لاجسٹک کمپنیوں اور متعلقہ خدمات کے شعبے میں بھی بے شمار روزگار کے دروازے کھلنے کی امید ہے۔معاشی ترقی کے تناظر میں اگر دیکھا جائے تو ریل کا نیٹ ورک اشیاءکی ترسیل، تاجروں کی آمد و رفت اور اندرونی منڈیوں سے رابطے کو بہتر بنائے گا۔ سیاحت کو فروغ ملے گا کیونکہ اب سیاح پہلگام، گلمرگ یا بانڈی پورہ جیسے مقامات تک نسبتاً آسانی سے پہنچ سکیں گے۔ سماجی ترقی کا پہلو بھی نہایت اہم ہے کیونکہ جب رابطے بہتر ہوتے ہیں تو تعلیم، صحت اور دیگر سہولیات کی رسائی میں بھی اضافہ ہوتا ہے، جس سے معیارِ زندگی بہتر ہوتا ہے۔یہ تمام ریل منصوبے کسی معجزے سے کم نہیں۔ شدید قدرتی رکاوٹوں کے باوجود ان کی تکمیل کا عزم نہ صرف ایک مضبوط منصوبہ بندی کا مظہر ہے بلکہ یہ وادی کے لیے ایک بہتر، روشن اور مربوط مستقبل کی نوید بھی ہے۔ کشمیر کی سرزمین پر بچھتی یہ پٹڑیاں صرف گاڑیاں نہیں دوڑائیں گی، یہ مواقع، امید اور ترقی کے سفر کو بھی نئی منزلوں کی طرف لے جائیں گی۔
