کرناہ//سرحدی علاقوں کے طلباء و طالبات اور خواتین کو بااختیار بنانے کی ایک تاریخی کوشش کے تحت، روبِل ناگی آرٹ فاؤنڈیشن نے بھارتی فوج کے تعاون سے آج کرناہ میں دو اہم سہولیات کا افتتاح کیا — مدرسہ شاہ ہمدان ٹنگڈار میں کمپیوٹر لیب اور مدرسہ روزۃ الصالحات باغ بیلہ میں سکل ڈیولپمنٹ سینٹر۔
کمپیوٹر لیب کا افتتاح مدرسہ شاہ ہمدان ٹنگڈار میں پیر کی صبح عمل میں آیا، جس میں ممتاز فنکارہ اور سماجی کارکن محترمہ روبل ناگی، فوجی افسران، مقامی عمائدین اور سول سوسائٹی کے اراکین نے شرکت کی۔ محترمہ ناگی نے طلباء اور اساتذہ سے پُرخلوص ملاقات کی اور انہیں مذہبی تعلیم کے ساتھ ساتھ ڈیجیٹل تعلیم اپنانے کی ترغیب دی۔انہوں نے کہا:
“آج مدرسہ شاہ ہمدان کے بچوں کے لیے ایک نئے دور کا آغاز ہے۔ دنیا تیزی سے ڈیجیٹل ہو رہی ہے اور ہماری ذمے داری ہے کہ سرحدی علاقوں کے بچوں کو بھی کمپیوٹر خواندگی تک رسائی فراہم کی جائے۔”نئی لیب میں بنیادی کمپیوٹر آپریشنز، ٹائپنگ، انٹرنیٹ استعمال، اور دیگر تعلیمی سافٹ ویئر شامل ہیں۔ مدرسے کے سینئر مدرس مولانا مفتی عطا الرحمن نے کہا:
“یہ خواب مدتوں سے دیکھا جا رہا تھا، آج اس کا پورا ہونا ہمارے لیے ایک نعمت ہے۔ ہم روبل صاحبہ اور بھارتی فوج کے شکر گزار ہیں۔”دوسری جانب، مدرسہ روزۃ الصالحات باغ بیلہ میں لڑکیوں اور خواتین کو خودکفیل بنانے کے لیے سلائی سینٹر کا افتتاح کیا گیا، جس میں 10 سلائی مشینیں فراہم کی گئیں۔ یہ مرکز خواتین کو کپڑوں کی سلائی اور سینے کی تربیت دے گا تاکہ وہ روزگار کما سکیں۔ایک استاد نے کہا”یہ مرکز ہماری طالبات کو ایک ایسا ہنر سکھائے گا جو ان کی پوری زندگی کا سہارا بن سکتا ہے۔”طالبات نے بھی خوشی کا اظہار کرتے ہوئے روبل ناگی فاؤنڈیشن اور فوج کا شکریہ ادا کیا اور اسے ایک روشن موقع قرار دیا۔مقامی سماجی رہنماؤں نے دونوں اقدامات کو سراہتے ہوئے کہا کہ یہ تعلیمی، ڈیجیٹل، اور فنی خلا کو پُر کرنے کی جانب ایک مثبت قدم ہے۔
فوج کے تعاون سے روبِل ناگی آرٹ فاؤنڈیشن نے کرناہ میں کمپیوٹر لیب اور سکل سینٹر کا افتتاح کیا
