پیرزادہ سعید
کرناہ // پلس پولیو امیونائزیشن (آئی پی پی آئی) کو آج کرناہ سب ڈویژن میں آسانی سے انجام دیا گیا۔ حفاظتی ٹیکوں کے پروگرام کا مقصد پولیو مائلائٹس کو ختم کرنا اور پانچ سال سے کم عمر کے تمام بچوں کو پولیو وائرس سے بچاؤ کے قطرے پلانا ہے۔ بلاک میڈیکل آفیسر کرناہ ڈاکٹر فاروق احمد قریشی کے مطابق آئی پی پی آئی پروگرام کے تحت 9818 بچوں کو حفاظتی ٹیکے لگانے کا ہدف تھا۔ انہوں نے بتایا کہ سب ڈویژن میں 66 پلس پولیو بوتھ قائم کیے گئے ہیں جن کے لیے 277 کارکنان بشمول 100 آنگن واڑی ورکرز، 92 آشا، 72 ہیلتھ ورکرز اور 13 سپروائزر کو حفاظتی ٹیکوں کے پروگراموں کو احسن طریقے سے انجام دینے کے لیے تعینات کیا گیا ہے۔ اس سلسلے میں تحصیلدار کرناہ، سی ڈی پی او، زیڈ ای او اور دیگر متعلقہ افسران نے آج مختلف پولیو بوتھس کا دورہ کرکے پلس پولیو کے کام کاج کا جائزہ لیا ۔ بتایا گیا کہ گزشتہ رات پیدا ہونے والے 7 نوزائیدہ بچوں کو بھی پولیو کے قطرے بھی پلائے گئے۔
گزشتہ ہفتے ڈپٹی کمشنر کپواڑہ آیوشی سوڈان نے پلس پولیو امیونائزیشن پروگرام کے لیے ڈسٹرکٹ ٹاسک فورس کی ایک میٹنگ کی صدارت کی جس دوران انہوں نے افسران پر زور دیا کہ وہ ضلع میں بچوں کی آبادی کو مکمل حفاظتی ٹیکے لگانے کو یقینی بنائیں اور کوئی بھی پیچھے نہ رہے۔
