شاردا دیوس سے قبل ایس ڈی ایم کرناہ کا تیٹوال مندر کا معائنہ، محکموں کو فول پروف انتظامات یقینی بنانے کی ہدایت:

ایل او سی تیٹوال، کرناہ، 16 ستمبر: تاریخی شاردا یاترا مندر تیٹوال میں آئندہ منعقد ہونے والے شاردا دیوس پروگرام کے پیش نظر ایس ڈی ایم کرناہ ریاض احمد نے آج مندر کے احاطے اور ملحقہ علاقوں کا جامع معائنہ کیا اور انتظامات کا جائزہ لیتے ہوئے متعلقہ محکموں کو تمام ضروری انتظامات مقررہ پروگرام سے قبل مکمل کرنے کی ہدایت دی۔
معائنے کا مقصد سب ڈویژنل انتظامیہ اور مختلف متعلقہ محکموں کی جانب سے پروگرام کی تیاریوں کا جائزہ لینا تھا تاکہ عقیدت مندوں کے پروگرام اور چھڑی مبارک جلوس کو پرامن، منظم اور خوش اسلوبی سے منعقد کیا جا سکے۔ یہ جلوس مذہبی اور ثقافتی اعتبار سے خصوصی اہمیت رکھتا ہے۔
ایس ڈی ایم کے ہمراہ سب ڈویژنل انتظامیہ کے افسران و اہلکاروں کے علاوہ متعلقہ محکموں کے نمائندے بھی موجود تھے۔ معائنے کے دوران پروگرام کے مقام اور مجوزہ جلوس کے راستے پر کیے جانے والے مختلف انتظامات پر تفصیلی تبادلہ خیال کیا گیا۔
سیو شاردا کمیٹی کشمیر کے چیئرمین رویندر پنڈتا نے ایس ڈی ایم اور دیگر افسران کو مجوزہ پروگرام کے حوالے سے بریفنگ دی۔ انہوں نے انتظامیہ کو پروگرام کے کامیاب انعقاد کے لیے درکار لاجسٹک سہولیات اور دیگر ضروریات سے بھی آگاہ کیا۔
انتظامیہ نے سکیورٹی، پینے کے پانی، بجلی کی فراہمی، صفائی ستھرائی، ٹریفک نظام، طبی امداد، بھیڑ کے نظم و نسق اور دیگر بنیادی شہری سہولیات سمیت مختلف انتظامات کا جائزہ لیا۔ اس کے علاوہ عقیدت مندوں اور زائرین کی آمد و رفت کو آسان بنانے کے لیے اطراف کے علاقوں کی حالت اور رسائی کا بھی جائزہ لیا گیا۔
ایس ڈی ایم ریاض احمد نے مقام پر مناسب شہری اور عوامی سہولیات کی فراہمی کی اہمیت پر زور دیتے ہوئے کہا کہ عقیدت مندوں کی متوقع شرکت کے پیش نظر تمام انتظامات پہلے سے مکمل کیے جائیں تاکہ پروگرام کے دوران کسی بھی شخص کو مشکلات کا سامنا نہ کرنا پڑے۔
انہوں نے تمام متعلقہ افسران کو قریبی تال میل کے ساتھ کام کرنے اور اپنی اپنی ذمہ داریاں مقررہ مدت کے اندر مکمل کرنے کی ہدایت دی۔ انہوں نے ٹریفک مینجمنٹ، صفائی ستھرائی اور طبی امداد کے مناسب انتظامات یقینی بنانے پر بھی زور دیا تاکہ کسی بھی ہنگامی صورتحال سے مؤثر انداز میں نمٹا جا سکے۔
سب ڈویژنل انتظامیہ نے اس عزم کا اعادہ کیا کہ تاریخی شاردا یاترا مندر تیٹوال کی مذہبی اہمیت اور تقدس کو برقرار رکھتے ہوئے شاردا دیوس پروگرام کو پرامن، منظم اور خوش اسلوبی سے منعقد کیا جائے گا۔
معائنے کے اختتام پر تمام متعلقہ محکموں کو ہدایت دی گئی کہ وہ پروگرام سے قبل مکمل طور پر تیار رہیں اور مختلف محکموں کے درمیان مؤثر اور مسلسل تال میل کو یقینی بنائیں