پونچھ: ایس ایس پی شفقت بھٹ کا پونچھ سے تبادلہ کر دیا گیا ہے، جبکہ ان کی جگہ مسٹر ویبھو مینا، جو اس سے قبل ایس پی ساؤتھ جموں کے عہدے پر تعینات تھے، کو پونچھ کا نیا سینئر سپرنٹنڈنٹ آف پولیس (ایس ایس پی) مقرر کیا گیا ہے۔
کسی انتظامی افسر کے ایک ضلع سے دوسرے ضلع میں تبادلے کے موقع پر مقامی عوام، سماجی کارکنوں اور مختلف تنظیموں کی جانب سے سبکدوش ہونے والے افسر کی عوامی خدمات کو سراہنے اور انہیں اعزاز سے نوازنے کی روایت رہی ہے۔ اسی روایت کے تحت پونچھ میں ہندو، سکھ اور مسلم برادریوں کی نمائندگی کرنے والی مختلف تنظیموں کی جانب سے ایس ایس پی شفقت بھٹ کے اعزاز میں الوداعی اور تہنیتی تقریبات کا انعقاد کیا جا رہا ہے۔
اسی سلسلے میں حال ہی میں گردوارہ سنت بھائی بہادر سنگھ جی، کھڑی دھرم سال، پونچھ کی کمیٹی کی جانب سے ایس ایس پی شفقت بھٹ کی وقف شدہ خدمات اور قابلِ ستائش کارکردگی کے اعتراف میں ایک خصوصی الوداعی تقریب منعقد کی گئی۔
اس تقریب میں مختلف معزز شخصیات اور برادری کے سرکردہ افراد نے شرکت کی، جن میں آل انڈیا سکھ اسٹوڈنٹس فیڈریشن کے صدر سردار ہرچرن سنگھ خالصہ اپنے سینئر ساتھیوں کے ہمراہ، ریٹائرڈ ہیڈ ماسٹر ماسٹر ہزارہ سنگھ، ریٹائرڈ ہیڈ ماسٹر سردار ہرچرن سنگھ اور گردوارہ سنت بھائی بہادر سنگھ جی، کھڑی دھرم سال کے سیکریٹری سردار سنتوکھ سنگھ شامل تھے۔
اس کے علاوہ نوجوانوں میں سردار دل باغ سنگھ، ویر جسپریت سنگھ، سونو ویر، میڈیا سے وابستہ چنی ویر اور سنگت کے دیگر معزز افراد بھی موجود تھے۔
اس موقع پر گرو رام داس جی کے حضور ارداس پیش کی گئی اور ایس ایس پی شفقت بھٹ کے مستقبل کے لیے نیک تمناؤں کا اظہار کیا گیا۔
گردوارہ کمیٹی کے اراکین نے کہا کہ پونچھ میں اپنی تعیناتی کے دوران شفقت بھٹ نے تمام برادریوں کے درمیان باہمی ہم آہنگی، محبت اور تعاون کو فروغ دینے میں اہم کردار ادا کیا۔ انہوں نے اپنی ذمہ داریاں پوری دیانت داری، خلوص اور پیشہ ورانہ مہارت کے ساتھ انجام دیں۔
گردوارہ سنت بھائی بہادر سنگھ جی، کھڑی دھرم سال کی سنگت نے ایس ایس پی شفقت بھٹ کو ان کی نئی ذمہ داری کے لیے نیک خواہشات پیش کرتے ہوئے امید ظاہر کی کہ وہ آئندہ تعیناتی پر بھی اسی جذبے، لگن اور خلوص کے ساتھ عوام کی خدمت جاری رکھیں گے