ضلع کپواڑہ میں پریس کلب کے قیام کی امیدیں روشن، صحافیوں کی انجمن نے ڈپٹی کمشنر کے سامنے اٹھایا دیرینہ مطالبہ

کپواڑہ، 12 نومبر: ضلع کپواڑہ میں صحافیوں کے لیے ایک مستقل اور باوقار پریس کلب کے قیام کی امید ایک بار پھر سامنے آئی ہے۔ اس سلسلے میں صحافیوں کی انجمن کپواڑہ (Journalists Association Kupwara) کی ایگزیکٹو کمیٹی کے ایک اعلیٰ سطحی وفد نے بدھ کے روز ضلع ترقیاتی کمشنر ابھشیک شرما (IAS) سے ملاقات کی اور صحافتی برادری کو درپیش مختلف مسائل سمیت پریس کلب کے قیام کی اہم ضرورت پر تفصیلی تبادلۂ خیال کیا۔
ملاقات کے دوران وفد نے ضلع میں پریس کلب کے قیام کے دیرینہ مطالبے کو ترجیحی بنیادوں پر حل کرنے پر زور دیتے ہوئے کہا کہ کپواڑہ جیسے وسیع جغرافیائی حدود اور اہمیت کے حامل ضلع میں صحافیوں کے لیے ایک مستقل ادارہ جاتی پلیٹ فارم کی عدم موجودگی ایک قابلِ توجہ مسئلہ ہے۔ وفد کے مطابق صحافی روزانہ عوامی مسائل، انتظامی معاملات اور سماجی و ترقیاتی سرگرمیوں کی رپورٹنگ کے ذریعے اہم ذمہ داریاں انجام دیتے ہیں، تاہم انہیں پیشہ ورانہ سرگرمیوں کے لیے ایک مشترکہ اور مناسب جگہ میسر نہیں ہے۔
وفد نے واضح کیا کہ پریس کلب کا قیام محض ایک عمارت یا دفتر کی فراہمی کا معاملہ نہیں بلکہ یہ ضلع میں صحافت کے معیار کو بہتر بنانے، صحافیوں کے درمیان باہمی روابط مضبوط کرنے اور پیشہ ورانہ صلاحیتوں کو فروغ دینے کی جانب ایک اہم قدم ہوگا۔ اس پلیٹ فارم کے ذریعے پریس کانفرنسوں، صحافتی اجلاسوں، سیمیناروں، تربیتی پروگراموں اور عوامی اہمیت کے حامل موضوعات پر بامقصد مباحثوں کا انعقاد بھی ممکن ہو سکے گا۔
صحافیوں کی انجمن نے ڈپٹی کمشنر سے اپیل کی کہ ضلع میں پریس کلب کے قیام کے لیے مناسب جگہ کی نشاندہی اور دیگر ضروری انتظامی اقدامات عمل میں لائے جائیں تاکہ صحافتی برادری کے اس دیرینہ مطالبے کو حقیقت کا روپ دیا جا سکے۔ ڈپٹی کمشنر ابھشیک شرما نے وفد کے مطالبے اور پیش کردہ تجاویز کو بغور سنا اور یقین دہانی کرائی کہ پریس کلب کے قیام سے متعلق معاملے کا جائزہ لیا جائے گا۔
ملاقات کے دوران صحافت اور ضلعی انتظامیہ کے درمیان بہتر تال میل، ادارہ جاتی تعاون اور عوامی مفادات سے جڑے معاملات کو مؤثر انداز میں اجاگر کرنے کے حوالے سے بھی تفصیلی گفتگو ہوئی۔ ڈپٹی کمشنر نے اس بات پر زور دیا کہ میڈیا اور انتظامیہ کے درمیان مثبت، ذمہ دارانہ اور تعمیری روابط ضلع کی مجموعی ترقی کے لیے نہایت اہم ہیں۔ انہوں نے کہا کہ میڈیا نہ صرف عوامی مسائل کو اجاگر کرنے کا ذریعہ ہے بلکہ سرکاری اقدامات اور ترقیاتی سرگرمیوں کو عوام تک پہنچانے میں بھی اہم کردار ادا کرتا ہے۔
انہوں نے بالخصوص شعبۂ تعلیم اور سیاحت کے فروغ سے متعلق اقدامات کو اجاگر کرنے میں میڈیا کے تعاون کی اہمیت پر روشنی ڈالی۔ ان کا کہنا تھا کہ کپواڑہ ضلع میں سیاحت کے بے پناہ امکانات موجود ہیں اور ان امکانات کو مناسب تشہیر اور مؤثر رابطہ کاری کے ذریعے مزید فروغ دیا جا سکتا ہے۔
اس موقع پر انجمن کے وفد نے بھی اس عزم کا اظہار کیا کہ صحافی عوامی مسائل کی نشاندہی کے ساتھ ساتھ ضلع میں تعلیم، سیاحت، سماجی بہبود اور ترقیاتی سرگرمیوں کو اجاگر کرنے میں اپنا مثبت اور ذمہ دارانہ کردار جاری رکھیں گے۔ وفد نے انتظامیہ اور میڈیا کے درمیان مسلسل رابطے اور باہمی مشاورت کے نظام کو مزید مستحکم بنانے کی ضرورت پر بھی زور دیا۔
اس اہم ملاقات میں صحافیوں کی انجمن کے صدر فیاض حمید، جنرل سیکریٹری کامران اشرف بٹ، سینئر اراکین تسدق حسین اور شاہد پیر، ترجمان فیضان الحق قریشی، کنوینر توصیف ہمدانی اور میڈیا کوآرڈینیٹر پیرزادہ زبیر موجود تھے۔
ملاقات کے اختتام پر صحافیوں کی انجمن نے امید ظاہر کی کہ ڈپٹی کمشنر کی جانب سے معاملے کا جائزہ لینے کی یقین دہانی کے بعد ضلع میں پریس کلب کے قیام کی سمت عملی پیش رفت ہوگی۔ انجمن نے اس بات پر زور دیا کہ کپواڑہ میں پریس کلب کا قیام نہ صرف مقامی صحافیوں کی پیشہ ورانہ ضروریات پوری کرنے میں معاون ثابت ہوگا بلکہ یہ ادارہ آزادیٔ صحافت، ذمہ دارانہ رپورٹنگ، صحافتی تربیت، باہمی اتحاد اور عوامی مسائل کے مؤثر اظہار کے لیے ایک مضبوط مرکز کی حیثیت اختیار کر سکتا ہے۔
صحافتی برادری کو توقع ہے کہ ضلعی انتظامیہ اس اہم ضرورت کو سنجیدگی سے لیتے ہوئے اسے عملی شکل دینے کے لیے ضروری اقدامات کرے گی