سرینگر، 12 ستمبر: فوڈ اینڈ ڈرگس ایڈمنسٹریشن (FDA) جموں و کشمیر نے نیشنل انسٹی ٹیوٹ آف فیشن ٹیکنالوجی (NIFT) بڈگام کیمپس میں کام کرنے والی میسرز سالاسر فوڈ سروسز کے خلاف مقررہ فوڈ سیفٹی، حفظانِ صحت اور صفائی کے معیارات کی خلاف ورزی پر کارروائی شروع کردی ہے۔
یہ کارروائی 11 ستمبر 2026 کو فوڈ سیفٹی افسران کی جانب سے ڈیزگنیٹڈ آفیسر فوڈ سیفٹی بڈگام کی نگرانی میں کی گئی فالو اَپ انسپکشن کے دوران سامنے آنے والی خلاف ورزیوں کے بعد کی گئی۔
معائنے کے دوران کھانے کی تیاری میں میعاد ختم شدہ اشیاء، جن میں وائٹ چیز ڈریسنگ اور تازہ پنیر شامل ہیں، کے استعمال کا انکشاف ہوا، جبکہ مصنوعی فوڈ کلر ’’ارون اورنج ریڈ‘‘ بھی موقع پر پایا گیا۔
معائنے کے دوران دیگر خامیوں میں بغیر ڈھکن کے ڈسٹ بن، RUCO (Repurpose Used Cooking Oil) پروٹوکول کی عدم تعمیل، یو وی ٹریٹمنٹ کے حامل RO واٹر پیوریفیکیشن سسٹم کی عدم دستیابی، فوڈ ہینڈلرز کے لیے حفاظتی لباس کی کمی اور فوڈ کی تیاری و ذخیرہ کرنے کے لیے مقررہ فوڈ کانٹیکٹ تقاضوں کے مطابق نہ ہونے والے ایلومینیم برتنوں اور آلات کا استعمال شامل ہے۔
خلاف ورزیوں کا نوٹس لیتے ہوئے ڈیزگنیٹڈ آفیسر فوڈ سیفٹی بڈگام نے متعلقہ فوڈ بزنس آپریٹر کو وجہ بتاؤ نوٹس (Show Cause Notice) جاری کیا ہے۔
حکام کے مطابق فوڈ سیفٹی اینڈ اسٹینڈرڈز ایکٹ 2006 اور اس کے تحت وضع کردہ قواعد و ضوابط کی متعلقہ دفعات کے تحت مزید کارروائی عمل میں لائی جائے گی۔
فوڈ سیفٹی اینڈ اسٹینڈرڈز ایکٹ 2006 کی دفعہ 56 کے تحت غیر صحت بخش یا غیر حفظانِ صحت حالات میں خوراک تیار یا سنبھالنے پر ایک لاکھ روپے تک جرمانہ عائد کیا جاسکتا ہے، جبکہ میعاد ختم شدہ اشیاء سمیت دیگر خلاف ورزیوں پر دفعہ 58 کے تحت دو لاکھ روپے تک جرمانہ عائد کیا جاسکتا ہے۔
ایف ڈی اے جموں و کشمیر نے تمام فوڈ بزنس آپریٹرز (FBOs) کو مقررہ فوڈ سیفٹی، صفائی اور حفظانِ صحت کے معیار پر سختی سے عمل کرنے اور صارفین کو محفوظ، معیاری اور حفظانِ صحت کے مطابق تیار کردہ خوراک فراہم کرنے کی ہدایت دی ہے۔
ایف بی اوز کو خوراک کی مناسب لیبلنگ اور ذخیرہ کاری، میعاد ختم شدہ اشیاء کو فوری طور پر ہٹانے اور خوراک کی تیاری و ذخیرہ کرنے کے لیے صرف فوڈ گریڈ برتنوں اور آلات کے استعمال کو یقینی بنانے کی بھی ہدایت دی گئی ہے۔
ایف ڈی اے نے RUCO پروٹوکول کے تحت استعمال شدہ کوکنگ آئل کی مجاز یا ایمپینل شدہ ایجنسیوں کے ذریعے وصولی، منتقلی اور تلفی کے عمل کی سختی سے پابندی پر بھی زور دیا اور استعمال شدہ تیل کے غیر مجاز دوبارہ استعمال سے خبردار کیا۔
