بالی ووڈ اور فلمی دنیا کی معروف شخصیات کا کرناہ کے شوریا گاتھا کمپلیکس کا دورہ، علاقے کے ثقافتی ورثے اور تاریخی اہمیت کو سراہا:

کرناہ، 12 نومبر: کپواڑہ ضلع کی خوبصورت وادی کرناہ میں واقع ایس ایم ہل کے شوریا گاتھا کمپلیکس میں ہندوستانی فلمی صنعت سے وابستہ تین ممتاز شخصیات نے دورہ کیا۔ ان کی آمد سے نہ صرف اس تاریخی مقام کو مزید نمایاں حیثیت حاصل ہوئی بلکہ کرناہ میں ثقافتی سیاحت، فلم سازی اور سنیما کے شعبے میں موجود وسیع امکانات کو بھی اجاگر کرنے کا موقع ملا۔
دورہ کرنے والی ممتاز شخصیات میں معروف بھارتی اداکار وپن شرما (Vipin Sharma) شامل تھے، جنہوں نے بالی ووڈ کی مشہور فلموں تارے زمین پر، گینگز آف واسع پور اور پان سنگھ تومر میں اپنی بہترین اداکاری کے ذریعے خاص پہچان حاصل کی ہے۔ ان کے ہمراہ بھارتی فلم اداکارہ نمرا تا جادھو (Namrata Jadhav) بھی موجود تھیں، جو مراٹھی اور ہندی سنیما میں اپنی اداکاری کے لیے جانی جاتی ہیں۔ انہوں نے یاری دوستی اور بھوت کال جیسی فلموں میں کام کیا ہے۔ جبکہ تیسری ممتاز شخصیت کپل متو (Kapil Mattoo) تھے، جو کشمیری فلمی صنعت سے وابستہ معروف فلم ساز، مصنف، پروڈیوسر اور ہدایت کار ہیں۔ وہ ہاپت (The Bear) اور تصرف دار (جنّات آف کشمیر) جیسے منصوبوں کے حوالے سے پہچانے جاتے ہیں۔
دورے کے دوران ان شخصیات نے شوریا گاتھا کمپلیکس کے مختلف حصوں کا تفصیلی جائزہ لیا، جن میں پہاڑی کلچر سینٹر، وار میوزیم اور وار میموریل شامل ہیں۔ اس موقع پر انہیں کرناہ کی قدیم تہذیب، منفرد ثقافتی شناخت، روایتی طرزِ زندگی، تاریخی پس منظر اور علاقے کے لوگوں کی بہادری، قربانیوں اور شجاعت کی داستانوں سے روشناس کرایا گیا۔
معزز مہمانوں نے علاقے کی منفرد پہاڑی ثقافت، روایات اور تاریخی ورثے میں گہری دلچسپی کا اظہار کیا۔ وار میوزیم اور وار میموریل کے ذریعے انہیں اس سرحدی خطے کی فوجی تاریخ اور قربانیوں کو قریب سے سمجھنے کا موقع ملا، جبکہ پہاڑی کلچر سینٹر میں موجود ثقافتی ورثے نے انہیں کرناہ کی منفرد تہذیب، رسم و رواج اور روایتی زندگی سے آگاہ کیا۔
اس موقع پر مہمانوں نے سدھنا ویلی کے خوبصورت قدرتی مناظر کے درمیان واقع سدھنا کیفے میں چائے اور کافی سے بھی لطف اٹھایا۔ یہاں انہیں مقامی لوگوں کی مہمان نوازی اور علاقے کی قدرتی خوبصورتی سے لطف اندوز ہونے کا موقع ملا۔ بلند و بالا پہاڑوں، دلکش مناظر اور پُرسکون ماحول نے اس دورے کو مزید یادگار بنا دیا۔
ان معروف فلمی شخصیات کا شوریا گاتھا کمپلیکس کا دورہ کرناہ کے لیے ایک حوصلہ افزا پیش رفت تصور کیا جا رہا ہے۔ قدرتی حسن، منفرد ثقافتی روایات، تاریخی مقامات اور جغرافیائی اہمیت کے اعتبار سے کرناہ میں سیاحت کے ساتھ ساتھ فلم سازی اور دستاویزی فلموں کی تیاری کے وسیع امکانات موجود ہیں۔
اس دورے نے ایک مرتبہ پھر اس حقیقت کو اجاگر کیا ہے کہ کرناہ جیسے نسبتاً کم معروف علاقوں کو قومی سطح پر متعارف کرانے کی ضرورت ہے، تاکہ یہاں کے ثقافتی اور تاریخی ورثے کو وسیع پیمانے پر پہچان مل سکے۔ اس سے نہ صرف سیاحت کو فروغ حاصل ہوگا بلکہ مقامی نوجوانوں کے لیے روزگار، کاروبار اور ثقافتی تبادلے کے نئے مواقع بھی پیدا ہو سکتے ہیں۔
شوریا گاتھا کمپلیکس، ایس ایم ہل کرناہ، محض ایک سیاحتی مقام نہیں بلکہ علاقے کی تاریخ، تہذیب، بہادری اور قربانیوں کی زندہ علامت ہے، جہاں ثقافت، شجاعت اور تاریخ ایک ساتھ جلوہ گر ہوتی ہیں