کپواڑہ، 26 جون: سرحدی علاقہ کرناہ کے گاؤں بڈھنمبل میں بدھ کی سہ پہر اچانک بادل پھٹنے کے واقعے نے بڑے پیمانے پر تباہی مچا دی، جس کے نتیجے میں زرعی اراضی، فصلوں اور بنیادی ڈھانچے کو شدید نقصان پہنچا۔
مقامی لوگوں کے مطابق دوپہر تقریباً تین بجے موسم نے اچانک کروٹ لی، تیز بارش اور گرج چمک کے ساتھ بادل پھٹنے کا واقعہ پیش آیا، جس کے باعث شدید سیلابی ریلے گاؤں میں داخل ہوگئے۔ ان ریلوں نے درجنوں کنال زرعی اراضی کو اپنی لپیٹ میں لے لیا، جس سے آلو، مکئی اور راجما سمیت مختلف فصلیں مکمل یا جزوی طور پر تباہ ہوگئیں۔
خوش قسمتی سے اس قدرتی آفت میں کسی جانی نقصان کی اطلاع نہیں ملی، تاہم کئی رہائشی مکانات کو جزوی نقصان پہنچا۔ اس کے علاوہ سڑکیں، پل اور حفاظتی بند بھی شدید متاثر ہوئے، جس کے باعث آمدورفت میں مشکلات پیدا ہوگئی ہیں۔
مقامی باشندوں کا کہنا ہے کہ بڈھنمبل کے بیشتر خاندان زراعت اور یومیہ مزدوری پر انحصار کرتے ہیں، اس لیے فصلوں کی تباہی نے ان کے معاشی حالات کو شدید متاثر کیا ہے اور کئی خاندانوں کا روزگار خطرے میں پڑ گیا ہے۔
علاقہ مکینوں نے ضلعی انتظامیہ سے مطالبہ کیا ہے کہ متاثرہ کسانوں کو فوری مالی امداد اور مناسب معاوضہ فراہم کیا جائے، جبکہ تباہ شدہ سڑکوں، پلوں اور حفاظتی پشتوں کی جلد از جلد مرمت اور بحالی کو یقینی بنایا جائے تاکہ مستقبل میں اس نوعیت کی قدرتی آفات سے ہونے والے نقصانات کو کم کیا جا سکے۔
بڈھنمبل کرناہ میں بادل پھٹنے سے تباہی، درجنوں کنال پر محیط فصلیں تباہ:
