کپواڑہ //: ڈپٹی کمشنر کپواڑہ شری کانت سوسے اور ایس ایس پی کپواڑہ سید الطاہر گیلانی نے آج کرناہ سب ڈویژن کے سیماری علاقے کا دورہ کیا، جہاں ایک دلخراش سڑک حادثے میں پانچ افراد جاں بحق جبکہ متعدد دیگر زخمی ہوگئے۔حادثے کے فوراً بعد ضلعی انتظامیہ اور کپواڑہ پولیس نے فوری طور پر ریسکیو آپریشن شروع کیا، جس میں سول انتظامیہ، پولیس، بھارتی فوج اور ایمرجنسی سروسز کی ٹیموں نے حصہ لیا۔ تمام مسافروں کو جائے حادثہ سے نکال کر فوری طور پر ایس ڈی ایچ ٹنگڈار پہنچایا گیا، جہاں ڈاکٹروں نے پانچ افراد کو مردہ قرار دیا۔
ضروری طبی و قانونی کارروائی مکمل کرنے کے بعد جاں بحق افراد کی لاشیں آخری رسومات کے لیے ان کے اہل خانہ کے حوالے کر دی گئیں، جبکہ چھ زخمیوں کو ابتدائی طبی امداد فراہم کرکے مستحکم حالت میں جی ایم سی ہندواڑہ منتقل کیا گیا۔ ضلعی انتظامیہ اور پولیس کے اعلیٰ افسران نے جی ایم سی ہندواڑہ کا بھی دورہ کیا اور زخمیوں کی حالت اور علاج معالجے کا جائزہ لیا۔
دورے کے دوران ڈپٹی کمشنر اور ایس ایس پی نے جائے حادثہ کا معائنہ کیا اور امدادی کارروائیوں کا جائزہ لیا۔ انہوں نے غمزدہ خاندانوں سے ملاقات کرکے گہرے رنج و غم کا اظہار کیا اور لواحقین سے دلی تعزیت کی۔
افسران نے متاثرہ خاندانوں کو یقین دلایا کہ ضلعی انتظامیہ کی جانب سے انہیں ہر ممکن تعاون اور ضروری مدد فراہم کی جائے گی
سیماری سڑک حادثہ: ڈی سی اور ایس ایس پی کپواڑہ کا جائے حادثہ کا دورہ
