سرینگر، 10 اکتوبر: نشہ مکت بھارت ابھیان کے تحت محکمہ اطلاعات (Department of Information) کے توسط سے دلکش ڈرامیٹک کلب نے 10 اکتوبر کو ڈریم لینڈ پبلک ہائی اسکول، بمنہ میں نشہ مخالف بیداری کے سلسلے میں ایک مؤثر نکڑ ناٹک پیش کیا۔ اس پروگرام کا مقصد طلبہ اور اساتذہ میں منشیات کے بڑھتے ہوئے استعمال کے مضر اثرات کے بارے میں شعور بیدار کرنا اور معاشرے کو اس مہلک لعنت سے محفوظ رکھنے کی اہمیت اجاگر کرنا تھا۔
اس نکڑ ناٹک کو اسکول کے طلبہ اور اساتذہ کرام نے بے حد سراہا۔ پروگرام کی ایک نمایاں خصوصیت یہ رہی کہ پیشہ ور فنکاروں کے ساتھ ساتھ اسکول کے بچوں نے بھی پورے جوش و خروش اور بھرپور دلچسپی کے ساتھ حصہ لیا۔ بچوں کی فعال شرکت نے اس بیداری مہم کو مزید مؤثر اور کامیاب بنانے میں اہم کردار ادا کیا۔
اس نکڑ ناٹک میں معروف فنکار نظیر مخدومی نے بطور ہدایت کار اپنی خدمات انجام دیں، جبکہ انجم شاہ، ظہور احمد، عادل فاروق، طارق جمیل اور عارف بٹ نے بھی اداکاری کے جوہر دکھائے۔ اس کے علاوہ حکیم جاوید، جہانگیر فراش، مجید وانی اور شیخ پرویز نے مہمان فنکاروں کی حیثیت سے شرکت کرکے پروگرام کو مزید مؤثر بنایا۔
پروگرام کے اختتام پر ڈریم لینڈ پبلک ہائی اسکول، بمنہ کے پرنسپل جناب طاہر صاحب نے تمام فنکاروں اور منتظمین کا فرداً فرداً شکریہ ادا کیا۔ انہوں نے اس بات پر زور دیا کہ منشیات کے خلاف بیداری کی سرگرمیوں کو صرف ایک اسکول یا ادارے تک محدود نہیں رکھا جانا چاہیے، بلکہ ایسی مہمات گھر گھر اور اسکول اسکول پہنچائی جانی چاہئیں، تاکہ نوجوان نسل کو منشیات کے مضر اثرات سے آگاہ کیا جاسکے اور انہیں اس خطرناک رجحان سے محفوظ رکھا جاسکے۔
انہوں نے اس امید کا اظہار کیا کہ اس طرح کی مسلسل کوششوں سے معاشرے میں مثبت تبدیلی لائی جاسکتی ہے اور اجتماعی تعاون کے ذریعے کشمیر کو منشیات کی بڑھتی ہوئی وبا سے نجات دلانے کی منزل حاصل کی جاسکتی ہے۔
پیغام: منشیات سے پاک معاشرہ ہماری مشترکہ ذمہ داری ہے۔ آئیے، بیداری، تعلیم اور اجتماعی کوششوں کے ذریعے ایک صحت مند، محفوظ اور روشن مستقبل کی تعمیر کریں۔